ప్రారంభించి రైలెక్కిన మంత్రి.. వెంటనే పట్టాలు తప్పి?

ప్రారంభించిన కొద్ది సేపటికి ట్రైన్ పట్టాలు తప్పితే ఎలా ఉంటుంది? అది కూడా ప్రారంభించిన మంత్రి ఆ రైల్లో ఉండగానే. సరిగ్గా అలాంటి ఘటనే కర్ణాటకలో జరిగింది. కానీ అది చిల్డ్రన్​ ట్రైన్. అయితే ఈ ఘటనలో ఎవరికీ ఎలాంటి ప్రమాదం జరగ లేదు. ఘటన జరిగిన సమయంలో రైలులో కేంద్ర మంత్రి ప్రహ్లాద్​ జోషి సహా కర్ణాటక మాజీ ముఖ్యమంత్రి జగదీష్​ శెట్టర్​ ఉన్నారని తెలుస్తోంది. కర్ణాటక హుబ్లీ లోని ఇందిరా గాంధీ గ్లాస్​ హౌస్​ గార్డెన్​లో శనివారం.. పిల్లల రైలు ప్రారంభోత్సవం సందర్భంగా ఈ ఘటన జరిగింది. రైలు పట్టాలు తప్పడం పై మంత్రి ప్రహ్లాద్​ జోషి అధికారులపై ఆగ్రహం వ్యక్తం చేశారు. హుబ్లీ -ధార్వాడ్​ స్మార్ట్​సిటీ ప్రాజెక్టులో భాగంగా రూ.4.2 కోట్ల వ్యయంతో ఇందిరా గాంధీ గ్లాస్​ హౌస్​ గార్డెన్​లో ఈ చిల్డ్రన్​ ట్రైన్​ను ఏర్పాటు చేశారు. శనివారం ఈ రైలు సేవలు ప్రహ్లాద్​ జోషి ప్రారంభించారు. అనంతరం ఆయన కూడా రైలులో ప్రయాణించే సమయంలో పట్టాలు తప్పడం వల్ల ప్రయాణికులు ఆందోళనకు గురయ్యారు. ఈ ఘటన మీద విచారణకు ఆదేశించారు.