Asia Cup 2022: పాకిస్థాన్‌పై శ్రీలంక విజయం.. ఫైనల్లో మరోసారి ఢీ
Sri Lanka, Pakistan: ఆసియా కప్ 2022 ఫైనల్‌ మ్యాచ్ రేపు జరుగనుంది. ఈ మ్యాచ్ కోసం ఇప్పటికే ఇరు జట్లు మైదానంలో ప్రాక్టీస్‌ ప్రారంభించాయి. ఆసియా కప్‌లో శ్రీలంక-పాకిస్థాన్ జట్ల మధ్య జరిగిన మ్యాచ్‌లో లంక విజయం సాధించింది. దీంతో ఫైనల్లో పాక్‌పైనే ఒత్తిడి ఉండే అవకాశం ఉంది. అంతకు ముందు మ్యాచ్‌లో టాస్ గెలిచి బౌలింగ్ ఎంచుకున్న శ్రీలంక అద్భుత ప్రదర్శన చేసింది. 19.1 ఓవర్లకే పది వికెట్లు తీసి పాకిస్థాన్ జట్టును 121 పరుగులకే కట్టడి చేసింది.
121 పరుగుల లక్ష్యంతో బరిలో దిగిన లంక.. మూడు ఓవర్లు మిగిలుండగానే మ్యాచ్ను ముగించింది. పాతుమ్ నిస్సాంక 48 బంతుల్లో 55 పరుగులు చేసి జట్టు విజయంలో కీలక పాత్ర పోషించాడు. అతడికి తోడు కెప్టెన్ దాసున్ శనక 16 బంతుల్లో 21 పరుగులు, భనుక రాజపక్స 19 బంతుల్లో 24 పరుగులు చేసి జట్టును విజయతీరాల వైపు నడిపించారు. కాగా పాక్‌ బ్యాటర్‌ బాబర్ అజమ్ 29 బంతుల్లో 30 పరుగులు చేశాడు. తర్వాత నవాజ్ 18 బంతుల్లో 26 పరుగులతో రాణించాడు. మిగతా ప్లేయర్లంతా పేలవ ప్రదర్శన చేశారు.
