Ravi Chandran Ashwin: ప్రపంచ నెం.1 బౌలర్ గా రవి చంద్రన్ అశ్విన్
Ravi Chandran Ashwin: ఆస్ట్రేలియాతో జరిగిన బోర్డర్‌-గవాస్కర్‌ సిరీస్‌లో నాలుగో టెస్టులో అద్భుతంగా బౌలింగ్ చేసిన భారత వెటరన్‌ స్పిన్నర్ రవిచంద్రన్‌ అశ్విన్ ఐసీసీ (ఇంటర్నేషనల్‌ క్రికెట్‌ కౌన్సిల్‌) బుధవారం విడుదల చేసిన కొత్త ర్యాంకింగ్స్‌లో బౌలర్ల జాబితాలో అగ్రస్థానానికి చేరుకున్నాడు. అహ్మదాబాద్ టెస్టులో బౌలర్లకు క్లిష్ట పరిస్థితులున్న పిచ్ పై ఆఫ్ స్పిన్నర్ అశ్విన్ తొలి ఇన్నింగ్స్ లో 91 పరుగులిచ్చి ఆరు వికెట్లు పడగొట్టాడు. ఈ నాలుగు మ్యాచ్‌ల సిరీస్‌లో 25 వికెట్లతో అత్యధిక వికెట్లు తీసిన బౌలర్‌గా నిలిచాడు. ఇది అతనికి ర్యాంకింగ్స్‌లో ప్రయోజనం చేకూర్చింది. ఇక అలా ఆయన 10 రేటింగ్ పాయింట్లతో ఇంగ్లాండ్ ఫాస్ట్ బౌలర్ జేమ్స్ ఆండర్సన్‌ను అధిగమించాడు. రవిచంద్రన్‌ అశ్విన్ సహచర లెఫ్టార్మ్ స్పిన్నర్ రవీంద్ర జడేజా (ఎనిమిదో నుంచి తొమ్మిదో ర్యాంక్‌కు దిగజారాడు) ర్యాంకింగ్స్‌లో ఒక స్థానం కోల్పోయాడు. భారత క్రికెట్‌ జట్టు స్టార్ ఆల్‌రౌండర్‌ అక్షర్‌ పటేల్‌ బీజీటీ తర్వాత ఐసీసీ టెస్టు ర్యాంకింగ్స్‌లో మెరుగ్గా దూసుకెళ్లాడు. బౌలింగ్‌లో అతను ఆరు స్థానాలు ఎగబాకి 28వ స్థానానికి చేరుకున్నాడు, ఆస్ట్రేలియాపై బ్యాటింగ్‌తో అక్షర్‌ పటేల్‌ బలమైన సహకారంతో అక్షర్‌ పటేల్‌ ఆల్ రౌండర్ల జాబితాలో రెండు స్థానాలు ఎగబాకి నాలుగో స్థానానికి చేరుకున్నాడు. ఈ జాబితాలో జడేజా, అశ్విన్‌లు తొలి రెండు స్థానాల్లో ఉన్నారు. గాయం కారణంగా జట్టుకు దూరమైన పేసర్ జస్ప్రీత్ బుమ్రా టెస్టు బౌలింగ్ ర్యాంకింగ్స్‌లో ఆరో స్థానం నుంచి ఏడో స్థానానికి చేరుకున్నాడు.
