Janardhan Mishra:నీటిని పొదుపు చేయాలంటే గుట్కా ,మద్యం సేవించండి..బీజేపీ ఎంపీ జనార్దన్ మిశ్రా

Janardhan Mishra: మధ్యప్రదేశ్‌లోని రేవా బీజేపీ ఎంపీ జనార్దన్ మిశ్రా సంచలన వ్యాఖ్యలు చేశారు. మద్యం తాగాలని గుట్కా నమలాలని, థిన్నర్ ను పీల్చాలని ప్రజలకు పిలుపునిచ్చారు. రేవాలో నీటి పరిరక్షణపై నిర్వహించిన వర్క్‌షాప్‌లో మాట్లాడుతూ ఆయనీ వ్యాఖ్యలు చేశారు. ఈ మాటలు ఇప్పుడు వైరల్​గా మారాయి. చేతులతో టాయిలెట్లు శుభ్రం చేసి వార్తల్లో నిలిచిన బీజేపీ ఎంపీ జనార్దన్​ మిశ్రా.. మరోమారు హెడ్​లైన్స్​కి ఎక్కారు.

ఈసారి నీటి పొదుపు అంశంపై ఆయన సంచలన వ్యాఖ్యలుచేసాడు. నీటిని పొదుపు చేసేందుకు ప్రజలు గుట్కా తినాలని, మద్యం ఎక్కువగా సేవించాలని పిలుపునిచ్చారు. జనార్దన్​ మిశ్రా ప్రసంగానికి సంబంధించిన వీడియో ప్రస్తుతం సామాజిక మాధ్యమాల్లో చక్కర్లు కొడుతోంది.

వాటర్​ కన్సర్​వేషన్​ అంశంపై మధ్యప్రదేశ్​ రేవాలోని కృష్ణరాజ్​ కపూర్​ ఆడిటోరియంలో ఇటీవలే ఓ వర్క్​షాప్​ జరిగింది. ఇందులో.. రేవా ఎంపీ జనార్దన్​ మిశ్రా పాల్గొన్నారు. ఈ క్రమంలోనే ఈ వ్యాఖ్యలు చేశారు. భుమి మీద నీరు ఉండటం లేదు. నీటిని పొదుపు చేయాలి. గుట్కా అయినా తినండి, లేదా మద్యాన్ని అయినా తాగండి, అయోడెక్స్​ అయినా ఎక్కువగా తినండి. ఏమైనా చేయండి, కానీ నీటిని ఆదా చేయండి. మీరు ఏం చేసినా నాకు ఇబ్బంది లేదు. కానీ నీటి పొదుపు విలువను మాత్రం అర్ధం చేసుకోండి అని జనార్దన్​ మిశ్రా అన్నారు.

వాటర్​ ట్యాక్స్​పై ప్రభుత్వం తగ్గింపును ఇస్తే మీరు వ్యతిరేకించండి. వాటర్​ ట్యాక్స్​ను కడతామని కావాలంటే ఇతర పన్నులను తగ్గించాలని మీరు డిమాండ్​ చేయండని బీజేపీ ఎంపీ జనార్దన్​ మిశ్రా చెప్పుకొచ్చారు. ఈ వ్యాఖ్యలపై పలువురు ప్రతిపక్ష నాయకులూ మండిపడుతున్నారు. యువతను, ప్రజలను చెడువ్యసనాలపై ఉసిగొల్పుతున్నాడని ఆగ్రహం వ్యక్తం చేస్తున్నారు.