Airbus Beluga: హైదరాబాదుకు తరలివచ్చిన అతిపెద్ద కార్గో ప్లేన్

Airbus Beluga: వినడానికి కాస్త ఆశ్చర్యకరంగా ఉన్నా మన హైదరాబాద్ కు ఒక అరుదైన అతిథి వచ్చింద.! ప్రపంచంలోనే అతిపెద్ద కార్గో విమానంగా గుర్తింపు పొందిన ఎయిర్ బస్ బెలూగా  హైదరాబాద్ లో ల్యాండైనట్టు ఎయిర్ పోర్టు యాజమాన్యం ఒక ప్రకటన విడుదల చేసింది. ఈ అతిథికి హైదరాబాద్ ఎయిర్ పోర్టు వర్గాలు స్వాగతం పలికాయి.  ఎయిర్ బస్ బెలూగా గత రాత్రి శంషాబాద్ ఎయిర్ పోర్టుకు చేరుకుంది. ఈ భారీ విమానం ల్యాండింగ్ సహా పార్కింగ్ కోసం ఎయిర్ పోర్టు అథారిటీ ప్రత్యేక ఏర్పాట్లు చేసింది. ఈ విమానం నేటి రాత్రి 7.20 నిమిషాల వరకు హైదరాబాదులోనే ఉంటుంది. ఇక ఈ విమానం కంటే ముందు ఏఎన్ ఆంటోనోవ్ కార్గో విమానం కూడా 2016లో ఇక్కడి విమానాశ్రయంలో ఎలాంటి ఇబ్బందులు లేకుండా ల్యాండైన సంగతి అందరికీ గుర్తుండే ఉంటుంది. తమ విమానాశ్రయంలో మౌలిక సదుపాయాలు, సాంకేతిక వనరులు పుష్కలంగా ఉన్నాయని, భారీ విమానాలు సైతం సాఫీగా ల్యాండవడం అందుకు నిదర్శనమని ఎయిర్ పోర్టు నిర్వహణ వర్గాలు ప్రకటనలో పేర్కొన్నాయి. ఇక ఎయిర్ బస్ సంస్థ తయారుచేసిన ఈ బెలూగా విమానం పొడవు 56 మీటర్లు కాగా బరువు 95 టన్నులు. దీన్ని నిర్మించిన ఎయిర్ బస్ సంస్థ ఒక తిమింగలం రూపంలో డిజైన్ చేసింది.