Naveen Case: నవీన్ కేసు రిమాండ్ రిపోర్టులో కీలక అంశాలు!
Naveen Case Reamand Report: నవీన్ కేసు రిమాండ్ రిపోర్టులో కీలక అంశాలు వెలుగులోకి వచ్చాయి. నవీన్ ని హత్య చేసేందుకు మూడు నెలల క్రితం హరిహర కృష్ణ ప్లాన్ చేశాడని అతను హైదరాబాద్ పూర్తిగా షిఫ్ట్ అయితే ప్రియురాలు తనకు దక్కదనే కసితో నవీన్ ను హత్య చేసినట్లు పోలీసులు గుర్తించారు. లవర్ విషయంలో నవీన్ అడ్డుగా ఉన్నాడని భావించి హరిహర కృష్ణ అతడిని హత్య చేయాలని భావించి నవీన్ ను ట్రాప్ చేసినట్లు పోలీసులు రిమాండ్ రిపోర్టులో పేర్కొన్నారు. రెండు నెలల క్రితం మలక్ పేట సూపర్ మార్కెట్ లో హరిహర కృష్ణ ఒక పదునైన కత్తిని కొనుగోలు చేసిన విషయాన్ని పోలీసులు గుర్తించారు. ఈ నెల 17వ తేదీన నవీన్ ను హరిహరకృష్ణ అత్యంత దారుణంగా హత్య చేసినట్టుగా పోలీసులు రిమాండ్ రిపోర్టులో పేర్కొన్నారు. హత్యకు ముందు హరిహర కృష్ణ, నవీన్ లు ఇద్దరూ మద్యం సేవించారని, పెద్ద అంబర్ పేట వద్ద ఉన్న మద్యం దుకాణంలో వీరిద్దరూ మద్యం కొనుగోలు చేసిన సీసీటీవీ పుటేజీని కూడా పోలీసులు సేకరించారని తేలింది. ముందు మద్యం బాటిల్ తో ఔటర్ రింగ్ రోడ్డుకు సమీపంలో నిర్మానుష్య ప్రాంతానికి వెళ్లి రాత్రి 9 గంటల నుండి 11:30 గంటల వరకు మద్యం తాగినట్లు రిమాండ్ రిపోర్టులో పోలీసులు పేర్కొన్నారు. మద్యం తాగిన తర్వాత లవర్ విషయంలో నవీన్, హరిహర కృష్ణ మధ్య ఘర్షణ జరిగింది, దీంతో నవీన్ ను హరిహర కృష్ణ హత్య చేసి నవీన్ శరీరభాగాలను వేరు చేశాడు. ఆ అనంతరం తెల్లవారుజామున మూడు గంటల వరకు హరిహర కృష్ణ అక్కడే ఉన్నట్లు పోలీసులు రిమాండ్ రిపోర్టులో పేర్కొని ఆ అనంతరం సమీపంలోనే ఉన్న స్నేహితుడు హసన్ ఇంటికి వెళ్లాడని పేర్కొన్నారు. స్నేహితుడి ఇంట్లోనే స్నానం చేసి తిరిగి వెళ్లిపోయాడని, హత్య విషయాన్ని కూడా స్నేహితుడికి చెప్పాడని, స్నేహితుడి ఇంటి నుండి తిరిగి నవీన్ ను హత్య చేసిన ప్రాంతానికి చేరుకున్నారని తేలింది.
