Hrithik Roshan:ఎన్టీఆర్ బ‌ర్త్‌డే సెల‌బ్రేష‌న్స్‌..హృతిక్ రోష‌న్‌ ఏమ‌న్నాడంటే..

Hrithik Roshan:టాలీవుడ్ స్టార్ హీరో యంగ్ టైగ‌ర్ ఎన్టీఆర్(NTR) ఈ రోజు (శ‌నివారం) త‌న 40వ పుట్టిన రోజు వేడుక‌లు జ‌రుపుకుంటున్నారు. ఈ సంద‌ర్భంగా ఎన్టీఆర్‌కు దేశ వ్యాప్తంగా ఉన్నఅభిమానుల‌తో పాటు సినీ సెల‌బ్రిటీలు కూడా పుట్టిన రోజు శుభాకాంక్ష‌లు తెలియ‌జేస్తూ ఆస‌క్తిక‌ర‌మైన పోస్ట్‌లు పెడుతున్నారు. అయితే బాలీవుడ్ హ్యాండ్స‌మ్ హీరో హృతిక్ రోష‌న్ మాత్రం చాలా భిన్నంగా ఎన్టీఆర్‌కు పుట్టిన రోజు శుభాకాంక్ష‌లు తెలియ‌జేయ‌డం ఆక‌ట్టుకుంటోంది.

ఎన్టీఆర్‌కు పుట్టిన రోజు శుభాకాంక్ష‌లు తెలియ‌జేస్తూనే `వార్ 2`లో ఇద్ద‌రి క్యారెక్ట‌ర్స్ ఎలా ఉండ‌నున్నాయో ఈ పోస్ట్‌తో హృతిక్ రోష‌న్ స్ప‌ష్టం చేశారు. అంతే కాకుండా ఎన్టీఆర్‌ని టీజ్ చేస్తూ హృతిరోష‌న్ పెట్టిన పోస్ట్ నెట్టింట ప్ర‌స్తుతం వైర‌ల్‌గా మారింది. `హ్యాపీ బ‌ర్త్‌డే తార‌క్‌. ఈ రోజును ఆనందంగా గ‌డ‌పాల‌ని కోరుకుంటున్నా..యాక్ష‌న్ ప్యాక్డ్ ఇయ‌ర్ ముందుంది. యుద్ధభూమిలో నీ కోసం ఎదురు చూస్తున్నా మిత్ర‌మా. మ‌నం క‌లిసే వ‌ర‌కు హ్యాపీగా, పీస్‌ఫుల్‌గా ఉండు` అంటూ స‌ర‌దాగా స్పందించారు.

చివ‌ర‌గా హృతిక్ `పుట్టిన రోజు శుభాకాంక్ష‌లు మిత్ర‌మా` అంటూ తెలుగు పదాల్లో శుభాకాంక్ష‌లు తెలియ‌జేయ‌డం విశేషం. హృతిక్ రోష‌న్ చేసిన స‌ర‌దా ట్వీట్ ప్ర‌స్తుతం సోష‌ల్ మీడియాలో వైర‌ల్ అవుతోంది. `బ్ర‌హ్మాస్త్ర` ఫేమ్ అయాన్ ముఖ‌ర్జీ ద‌ర్శ‌క‌త్వంలో య‌ష్ రాజ్ ఫిలింస్ వారు స్పై యూనివ‌ర్స్‌లో భాగంగా `వార్ 2`ని నిర్మిస్తున్నారు. హృతిక్ రోష‌న్‌తో పాటు ఈ మూవీలో యంగ్ టైగ‌ర్ ఎన్టీఆర్ కూడా న‌టించ‌నున్నారు. ఈ విషయాన్ని ఇంత వ‌ర‌కు ఎన్టీఆర్ కానీ, య‌స్ రాజ్ ఫిలింస్ వారు కానీ అధికారికంగా ప్ర‌క‌టించ‌లేదు.

తాజాగా హృతిక్ రోష‌న్ వెల్ల‌డించ‌డంతో ఎన్టీఆర్ అభిమానులు ఖుషీ అవుతున్నారు. ఎన్టీఆర్ న‌టిస్తున్న తొలి బాలీవుడ్ ఫిల్మ్ ఇది. ఇంత‌కు ముందు సిద్దార్ధ్ ఆనంద్ రూపొందిచిన `వార్‌` మూవీలో హృతిక్ రోష‌న్‌, టైగ‌ర్ ష్రాఫ్ న‌టించారు. ఆదిత్య చోప్రా స్టోరీ అందించిన నిర్మించిన ఈ స్పై యాక్ష‌న్ డ్రామా 2019లో విడుద‌లై బ్లాక్ బ‌స్ట‌ర్ అనిపించుకుంది. దానికి సీక్వెల్ గా `వార్ 2`ని ప్రారంభించ‌బోతున్నారు. దీనికి `బ్ర‌హ్మ‌స్త్ర‌` డైరెక్ట‌ర్ అయాన్ ముఖ‌ర్జీ ద‌ర్శ‌కత్వం వ‌హిస్తుండ‌గా హోరా హోరీగా సాగే పాత్ర‌ల్లో హృతిక్ రోష‌న్‌, ఎన్టీఆర్ న‌టించ‌నున్నారు.

అయితే ఇందులో తార‌క్ క్యారెక్ట‌ర్ మాత్రం ప‌వ‌ర్ ఫుల్‌గా ఉంటుంద‌ని, నెగెటివ్ షేడ్స్‌తో సాగుతుంద‌ని తెలుస్తోంది. ఈ ప్రాజెక్ట్ కోసం భారీగా పారితోషికాన్ని ఎన్టీఆర్ సొంతం చేసుకున్నార‌ని కూడా వార్త‌లు వినిపిస్తున్నాయి. ఎన్టీఆర్ స్టార్ డైరెక్ట‌ర్ కొర‌టాల శివ రూపొందిస్తున్న‌`దేవ‌ర‌`మూవీలో న‌టిస్తున్నారు. ఇది వ‌చ్చే ఏడాది ఏప్రిల్ 5న పాన్ ఇండియా వైడ్‌గా ప్రేక్ష‌కుల ముందుకు రానుంది. హృతిక్ రోష‌న్ ప్ర‌స్తుతం `ఫైట‌ర్‌` మూవీ చేస్తున్నారు. దీపికా ప‌దుకొనే హీరోయిన్ గా న‌టిస్తున్న ఈ సినిమా వ‌చ్చే ఏడాది జ‌న‌వ‌రి 25న విడుద‌ల కానుంది. ఈ రెండు సినిమాల త‌రువాతే ఎన్టీఆర్‌, హృతిక్ `వార్ 2` సెట్‌లోకి అడుగు పెట్ట‌నున్నారు.

Happy Birthday @tarak9999! Wishing you a joyous day and an action packed year ahead. Awaiting you on the yuddhabhumi my friend. May your days be full of happiness and peace

…until we meet 😉

Puttina Roju Subhakankshalu Mitrama 🙏🏻

— Hrithik Roshan (@iHrithik) May 20, 2023