Balakrishna: ప్రభుత్వాన్ని విమర్శిస్తూ సంభాషణలు అందుకేనన్న బాలకృష్ణ!

Balakrishna on Dialouges Against Government: చంద్రగిరి ఎస్వీ థియేటర్ లో బాలకృష్ణ సందడి చేశారు. సంక్రాంతికి బావ చంద్రబాబు స్వగ్రామం నారావారిపల్లె నుంచి స్వయంగా నందమూరి మోక్షజ్ఞ, నారా దేవాన్ష్, వసుంధర దేవిలతో కారులో వచ్చిన బాలయ్యకు ఘనంగా స్వాగతం పలికారు అభిమానులు. ఇక ఈ క్రమంలో థియేటర్ వద్ద కోలాహలం నెలకొనగా అభిమానులు జై బాలయ్య జై జై బాలయ్య అంటూ నినాదాలు చేస్తూ హోరెత్తించారు. అభిమానులు తెచ్చిన 50 కేజీల భారీ కేక్ కట్ చేసిన బాలయ్య తన అభిమానులు, కుటుంబ సభ్యులతో కలిసి వీర సింహారెడ్డి చిత్రాన్ని వీక్షీంచారు. అనంతరం చంద్రగిరిలో మీడియాతో మాట్లాడిన బాలకృష్ణ వీరసింహారెడ్జి చిత్రానికి ప్రేక్షకులు బ్రహ్మరథం పడుతున్నారని అన్నారు. సంక్రాంతి పండగ అంటే బాలకృష్ణ పండగ అని వీర సింహారెడ్డి  ఫ్యాక్షన్ సినిమా కాదని, సకుటుంబ సపరివార సమేతంగా చూస్తున్నారని అన్నారు. నిర్మాతలు చిత్రాన్ని నాణ్యతలో రాజీపడకుండా నిర్మించారని పేర్కొన్న బాలయ్య దర్శకుడు గోపీచంద్ మలినేని నా అభిమానిగా గొప్పగా సినిమా తీశారన్నారు. ఆణిముత్యం లాంటి పాటలకు వజ్రాల్లాంటి బాణీలు థమన్ సమకూర్చారని అలాగే ప్రేక్షకులు మంచి సినిమా చేస్తే ఆదరిస్తారని అన్నారు. సినిమాలో ప్రభుత్వాన్ని విమర్శిస్తూ సంభాషణలు ఉన్నాయన్న దానిపై స్పందించిన బాలకృష్ణ ప్రజల అభిమానాన్ని ఎవరూ అడ్డుకోలేరని, ప్రజలకు వాస్తవాలు తెలుసని అన్నారు. రాష్ట్రంలో ఎమెర్జన్సీ పరిస్థితులు ఉన్నాయని పేర్కొన్న ఆయన ఓ నటుడిగా, ఎమ్ఎల్ఏగా, ఓటరుగా చెపుతున్నానని అన్నారు. జరుగుతున్న పరిస్దితులనే వీరాసింహా రెడ్డి సినిమాలో చూపించామని ఈ సందర్భంగా ఆయన పేర్కొన్నారు.