Andhra Pradesh: వైద్య విద్యార్థులకు డ్రెస్ కోడ్ వార్తలు అవాస్తవం : ఏపి డీఎంఈ
Andhra Pradesh: ఆంధ్రప్రదేశ్ లోని వైద్య విద్యార్థులు ఇకపై జీన్స్ ప్యాంట్లు, టీషర్టులు ధరించకూడదని.. కేవలం సంప్రదాయ దుస్తులు ధరించి కళాశాలకు రావాలంటూ డైరెక్టర్ ఆఫ్ మెడికల్ ఎడ్యుకేషన్ ఆదేశించినట్టుగా వచ్చిన వార్తలు వైరల్ అయ్యాయి. అమ్మాయిలు చీర లేదా చుడీదార్‌తో రావాలని, జుట్టును వదులుగా వదిలేయొద్దని, అలాగే పురుషులైతే క్లీన్ షేవ్‌తో రావాలంటూ డీఎంఈ ఆదేశించినట్టు వార్తలు హల్‌చల్ చేశాయి. ఈ వార్తలపై డీఎంఈ స్పందించింది. సోషల్ మీడియాలో వైరల్ అవుతున్న ఈ వార్తలను నమ్మొద్దని ఈ విషయంలో తాము ఎలాంటి ఆదేశాలు జారీ చేయలేదని డీఎంఈ డాక్టర్ వినోద్ కుమార్ స్పష్టం చేశారు.
విధుల్లో ఉన్న సమయంలో ఆరోగ్యశాఖ ఉద్యోగులు, వైద్యులు స్టెతస్కోప్, యాప్రాన్, ఐడీ కార్డు ధరించాలన్న అంశంపై ఉద్యోగ, ఇతర సంఘాల నాయకులతో చర్చలు జరుగుతున్నట్టు చెప్పారు. దీనిపై త్వరలోనే మార్గదర్శకాలు విడుదల చేస్తామని డాక్టర్ వినోద్ కుమార్ వివరించారు. పుకార్లు ఎవరు నమ్మవద్దని డైరెక్టర్ ఆఫ్ మెడికల్ ఎడ్యుకేషన్ వెల్లడించింది.
