Sajjala : చంద్రబాబు వ్యాఖ్యలు పిట్టల దొర, కమెడియన్ మాట్లాడినట్లు ఉన్నాయి!

Sajjala Ramakrishna Reddy: చంద్రబాబు మాటలు వింటే ఆశ్చర్యం, నవ్వు వస్తున్నాయని ప్రభుత్వ సలహాదారు సజ్జల రామకృష్ణారెడ్డి అన్నారు. సాధారణ ఎన్నికల్లో గెలిచినంత ఆత్రుత చంద్రబాబులో కనిపించిందని, మూడు ఎమ్మెల్సీల్లో గెలిచి మా పై వ్యాఖ్యలు చేయటం ఆశ్చర్యంగా ఉందని అన్నారు. 2019లో మిమ్మల్ని ప్రజలు తుక్కు తుక్కుగా తొక్కారుగా, ఉప ఎన్నికలు, స్థానిక సంస్థల ఎన్నికల్లో అడ్రెస్ లేకుండా ఓడిపోయిన పరిస్థితి గురించి ఏం చెబుతారు?? అని సజ్జల రామకృష్ణారెడ్డి ప్రశ్నించారు. చంద్రబాబు వ్యాఖ్యలు పిట్టల దొర, కమెడియన్ మాట్లాడినట్లు ఉందని అన్నారు. నిజంగా చంద్రబాబుకు దుమ్ము ధైర్యం ఉంటే 175 స్థానాల్లో పోటీ చేయమని ఒక్క మాట అయినా అనగలవా?? దత్త పుత్రుడు లేకుండా అడుగు బయట పెట్ట లేని పరిస్థితి ఎందుకు?? అని ప్రశ్నల వర్షం కురిపించారు.

పశ్చిమ రాయలసీమ ఎన్నికల్లో అధికారులు వ్యవహరించిన తీరు అభ్యంతరకరంగా ఉందని, టీడీపీలోని పెద్ద పెద్ద నాయకులు ఏజెంట్లుగా వచ్చి కూర్చున్నారని అన్నారు. ఈ దబాయింపు ఎందుకు? అసలు మేం అధికారంలో ఉన్నామా అనే మాకే ఒక్కోసారి అనుమానం వస్తుందని అన్నారు. మేం ఆధారాలతో అవకతవకలు చూపించామా లేదా?? ప్రజాస్వామ్యబద్ధంగా పోరాటం చేశాం, బుల్డోజ్ చేయడం మాకు చేతకాదని ఆయన అన్నారు. అధికారులు మా అడుగులకు మడుగులు ఎత్తినట్లు అయితే ఫలితాలు ఇలా ఉండవని అన్నారు. చంద్రబాబు గురించి చెప్పించుకునే పరిస్థితిలో వైసీపీ లేదని పేర్కొన్న ఆయన చంద్రబాబు రిజెక్టెడ్ పొలిటీషియన్ అని ఈ జీవితంలో శాసనసభ లో అడుగు పెట్టే అవకాశాన్ని కోల్పోయాడని అన్నారు.